Дзе пачуць беларускую ў Дзень роднай мовы?

Роўна год таму мы запусцілі першы беларускамоўны эфір з нагоды святкавання Міжнароднага дня роднай мовы. З таго часу Samoe Radio штотыдзень робіць агляд актуальных міравых падзей на мове і шчыра дзеліцца якаснай музыкай на беларускай мове. Сёння мы вырашылі падзяліцца спісам месцаў, дзе канцэнтрацыя мовы на квадратны метр будзе проста зашкаліваць – і ўсё таму, што Мінск святкуе Дзень роднай мовы.

Свята роднай мовы ад Арт Сядзібы

Няма чаго доўга распавядаць пра культурную пляцоўку “Арт Сядзіба”: жывучы ў сталіцы вы так ці інакш сутыкаліся з яе дзейнасцю, можаце быць упэўненыя. Гэта як раз тыя людзі, якія робяць сваю справу максімальна якасна і з адметным нацыянальным густам. Таму даставайце тэлефоны і рабіце нататку: кавярня “Грай” (Інтэрнацыянальная, 33), 17:00. Арганізатары абяцаюць насычаную праграму з выступамі музыкаў, жывой бібліятэкай, гульнятэкай і іншымі цікавасцямі. А яшчэ яны там кажуць, што напрыканцы копію Ўстаўной граматы БНР дадуць, вар’яты.

Падрабязней: https://vk.com/dzenmovy2018

Дзень роднай мовы ЗБС

Нацыянальны студэнцкі рух ладзіць не толькі адукацыйныя праграмы, але і спрыяе захаванню мовы. Не будзе песен і танцаў як у “Грай”, але чакаюцца выступы гасцей, якія пакужць, што мова ёсць першы крок на шляху да поспеху, кінапрагляд у беларускай агучцы і нават размалёўка печыва ў нацыянальным стылі і іншыя прыемныя дробязі. Даем каардынаты: Пакой 3/0/2 (Леніна, 50), 18:30.

Падрабязней: https://vk.com/movazbs

Міжнародны дзень роднай мовы ў БДУКМ

Арганізатары ўпэўненыя, што любая дзейнасць па захоўванню роднай мовы дапамагае лепш разумець культурныя традыцыі, а таксама спрыяе гарманічнаму развіццю ў адносінах паміж народамі. Студэнты Беларускага дзяржаўнага ўніверсітэту культуры і мастацтваў пры падтрымцы Рэспубліканскага цэнтра нацыянальных культур, запрашаюць на культурна-асветніцкую праграму і святочны канцэрт, прысвечаны Міжнароднаму дню роднай мовы, з удзелам нацыянальных калектываў мастацкай творчасці Беларусі, Украіны, Малдовы, Чувашыі, Польшчы, Грузіі, Арменіі, Дагестана.

Зацікавіліся будучымі працоўнікамі ў сферы культуры? Запісвайце падрабязнасці: Рэспубліканскі цэнтр нацыянальных культур (Чычэрына, 19), 18:30.

“Рэвізор” ці “Раскіданае гняздо”

Мы ведаем, што сярод вас ёсць аматары высокага тэатральнага мастацтва, якім не вельмі да спадобы сучасная беларуская музыка, лекцыі пра папулярызацыю мовы і г.д. Спецыяльна для вас падабралі 2 выдтнейшыя пастаноўкі ў любімым Купалаўскім і Тэатры беларускай драматургіі. Хоць там пачуйце мову сёння, ну.

“Рэвізор” -  Тэатр імя Янкя Купалы (Энгельса, 7), 19:00

“Раскіданае гняздо” – Тэатр беларускай драматургіі (Крапоткіна, 44), 19:00

Якую б кропку на мапе Мінска вы не абралі, паспрабуйце сёння быць беларусам крышачку больш (можаце павітацца, напрыклад, па беларуску ці сказаць у сталоўцы “дзякуй”). Samoe Radio любіць мову і спадзяецца, што вы возьміце ад гэтага дня ўсё толькі самае!

.txt - Дар'я Рублеўская